25-11-2018
Հակիրճ նկարագիր
2018թ. սեպտեմբերին «Հասարակական հետազոտությունների առաջատար խումբ» ՀԿ-ն (APR Group) Հայաստանում ԱՄՆ դեսպանատան ֆինանսական աջակցությամբ սկսել է իրականացնել «Աջակցություն աշխատանքային իրավունքների պաշտպանության կոլեկտիվ մեխանիզմներին» ծրագիրը:
Ծրագիրը նպատակ ունի խթանելու Հայաստանում այլընտրանքային արհմիութենական շարժումը, որպես աշխատանքային իրավունքների կոլեկտիվ պաշտպանության մեխանիզմ:
Ծրագրի շրջանակում APR Group-ը նախաձեռնել է ոլորտում առկա խնդիրների ուսումնասիրություն՝ վերհանելու առկա օրենսդրական և իրավական բացերն ու հնարավորությունները, ինչպես նաև գտնելու լուծումներ արդյունավետ արհմիութենական համակարգի ձևավորման համար:
Ծրագրի շրջանակներում կազմակերպությունը հայտարարում է մրցույթ ուսումնասիրության արդյունքների հիման վրա հանրային իրազեկման և ջատագովության (advocacy) նպատակով քարոզարշավի նյութերի պատրաստման և հանրային միջոցառումների կազմակերպման ծառայությունների համար:
Ծառայության նկարագիրը
- Աջակցել ծրագրի շրջանակներում իրականացվող ուսումնասիրության արդյունքների հանրային իրազեկման և ջատագովության մոտեցումների, մեթոդների և գործողությունների մշակման/թարմացման գործընթացին,
- Մշակել ծրագրի վերաբերյալ տեղեկատվական նյութերի բովանդակությունը (օրինակ՝ ուսումնասիրության հակիրճ նկարագիր, ստիկերներ, ինֆոգրաֆիկաներ և այլն) և դիզայնը,
- Ուսումնասիրության արդյունքների և առաջարկությունների հիման վրա մշակել ջատագովության և հանրային իրազեկման հիմնական ուղերձները,
- Աջակցել ծրագրով նախատեսված հանրային միջոցառումների կազմակերպման հարցում (օրինակ՝ դահլիճի ընտրություն, օրակարգի, մամուլի հաղորդագրությունների մշակում, միջոցառման աուդիո-վիզուալ նյութերի պատրաստում և այլն),
- Ծրագրի ջատագովության և հանրային իրազեկման բաղադրիչի շրջանակներում կապ պահպանել հաղորդակցություն զանգվածային լրատվության միջոցների հետ՝ ծրագրի արդյունքների և միջոցառումների տեսանելիության և հրապարակայնության ապահովման նպատակով,
- Առաջարկել և կիրառել ծրագրի արդյունքներն ու ուղերձները սոցիալական հարթակների, մասնավորապես կազմակերպության ֆեյսբուքյան էջի միջոցով տարածելու գործիքներ և մեխանիզմներ:
Պահանջվող որակավորումներ
- Բարձրագույն կրթություն լրագրության, հանրային կապերի հաղորդակցության կամ համանման այլ ոլորտներում,
- Առնվազն 5 տարվա մասնագիտական փորձառություն հաղորդակցության հանրային կապերի և լրագրության ոլորտում, նախընտրելի է՝ ՀԿ հատվածում,
- Գրավոր և բանավոր հաղորդակցման գերազանց հմտություններ,
- Կազմակերպչական և համագործակցման գերազանց հմտություններ,
- Հայերենի, անգլերենի գերազանց իմացություն, ռուսերենի իմացությունը՝ ցանկալի է,
- Ստեղծագործ մտածողություն և նախաձեռնողականություն,
- Համակարգչային գիտելիքներ:
Ծառայության տևողությունը
2019 թ. հունվար – փետրվար (2 ամիս)
Ինչպես դիմել
Վերոնշյալ որակավորումներին համապատասխանող և հետաքրքրված անհատները, ինչպես նաև կազմակերպությունները կարող են ուղարկել իրենց հայտերը մինչև ս.թ. դեկտեմբերի 17-ը
Հայտերը պետք է բաղկացած լինեն՝
- Ինքնակենսագրականից (կազմակերպության դեպքում կազմակերպության փորձը և աշխատակազմի ինքնակենսագրականները),
- Հետաքրքրության նամակից:
